អំពីក្រុមហ៊ុន

ភោជនីយដ្ឋានបាយ័នបានចាប់បដិសន្ធិឡើងនៅថ្ងៃទី ១២ ខែធ្នូ ឆ្នាំ ២០០៩ មានឈ្មោះថាតារាវាលស្បូវ។ បានបង្កើតឡើង ដោយស្ថាបនិកគូស្វាមីភរិយាថ្មោងថ្មីក្រីក្រពីររូបគឺលោក បែន រតនៈនិងលោកស្រី ថេ ដាឡែន រួមគំនិតគ្នាបើកអាជីវកម្មហាង គុយទាវតូចមួយ។គ្រានោះមានបុគ្គលិកបម្រើការត្រឹមតែ ៥ នាក់ប៉ុណ្ណោះ។

ដោយលោកទាំងពីរទទួលបាននូវមរតកកំណើតដ៏ឧត្តុង្គឧត្តមប្រពៃថ្លៃថ្លាពីមាតាបិតាជាបុព្វាចារ្យផង និងសេចក្តីព្យាយាមអភិវឌ្ឍខ្លួននូវចំណេះជំនាញផ្នែកមនុស្សសាស្ត្រ និង វិទ្យាសាស្ត្រផងពិសេសគឺភាពប៉ិនប្រសប់ក្នុងការបង្កើតបង្កើនរសជាតិនិងគុណភាពទឹកស៊ុបគុយទាវសាច់ចិញ្ច្រាំជារួមទាំងការបម្រើល្អឥតខ្ចោះផង ធ្វើឱ្យមានការទាក់ទាញភ្ញៀវគ្រប់វ័យកើនឡើងជាលំដាប់ឥតឈប់ឈរ។

មកដល់ឆ្នាំ ២០១៤ ហាងគុយទាវ តារាវាលស្បូវ ក៏បានផ្លាស់ប្តូរឈ្មោះទៅជា “ភោជនីយដ្ឋានបាយ័ន”តម្រូវតាមនិស្ស័យតម្លៃជីវិតនៃស្ថាបនិកទាំងពីរដែលមានភាពស្មោះ ត្រង់ អំណត់តស៊ូ និង ការដឹងគុណតបគុណចំពោះបុព្វបុរសខ្មែរមាតាបិតាព្រមទាំងអតិថិជនទាំងអស់ ពិសេសជាងនេះទៀតគឺ មានបំណង “រួមរក្សាអាហារវប្បធម៌ខ្មែរ”និងផ្សព្វផ្សាយនូវគ្រប់រសជាតិនៃម្ហូបអាហារខ្មែរដល់ភ្ញៀវបរទេស។